CAPRICCI DIALETTALI / 12

LA FUNTANA ED VIA OBICI

(La fontana di via Obici fotografata prima della sua scomparsa)

Con tótt sti cambiamèint

óna matèina a i'ho avù un presentimèint:

duv'éla la funtàna? L'è sparìda.

Forse i l'han rapìda.

Povra funtàna dla mé fanciulàzza!

A i'ho pruvèe óna gran tristàzza,

forse la ruvinéva al paesàg'

par chi l'éra ed passàg'.

Un zavài dal pasèe, un sìmbol dla povertèe

la deturpéva la modernitèe.

L'éra atàch a la préma clòuna ed via Obici da tant an,

un ricòrd importànt par la comunitèe,

chi pasèva al bvìva e as lavèva al man.

Cal piazèl an n'è pió quàl, trasfurmèe.

Ma che fastédi dèvla cla funtàna?

Tótt sparìi, tótt cambiée,

l'è diffìcil da spieghèr, a m'indespiés...

Ma possìbil che in l'àven ancàra capìda

che i cittadèin i van ascultèe,

ma con sti cambiamèint

l'è come parlèr al vèint!

A gh'è chi dis: "Come l'è bèl!".

Ma gi só: agh vdìv balùgh?

Che brutàzza cal piazèl!

As vad sol dal cemèint,

al vérd scurdèvel, la cura dal sol

par i vec' l'è un divertimèint.

Ma attenziòun: par consolaziòun

i han cambiée anch i lampiòun:

l'è tótta óna rivoluziòun,

anch se i éren piò bée qui ch'a gh'éra,

i pèren dal frost par al zabaiòun.

Vlìv vàder che la funtàna i l'han spustèda?

Forse parchè vècia sol cambiéda?

A spér, a m'àugur ed vàderla da quelch cantòun,

se no l'è òna bèla delusiòun!

Al pasèe al vèl anch par al novi generaziòun.

(testo di Laura Bertarelli tratto dal blog http://luigibarozzi.blogspot.it/ di giugno 2017)